پر کابل پوهنتون خونړي بريد په اړه غبرګونونه

د روان کال د لړم د مياشتې په ۱۲مه، کابل په پوهنتون کې هغه وخت د ‌ډزو غږونه واورېدل شول چې تمه وه په دغه ورځ د کابل پوهنتون په زړه کې،د افغانستان او ايران د کتابونو ګډ نندارتون پرانیستل شي.
د افغانستان د عامې روغتیا وزارت په وينا، په دغه برید کې ۲۲ کسان ووژل شول.
د ولسمشر لومړی مرستیال امرالله صالح د برید د ټپیانو شمېر ۴۰ تنه ښيي او همدارنګه د بريد د ورځې په ناوخته شېبو کې بيا د کورنيو چارو وزارت وياند طارق آرين په خپل ټوېټر پاڼه وليکل: «پر کابل پوهنتون برید پای ته ورسېد.په دغه برید کې ۲۵ کسانو ته مرګژوبله اوښتې،۳ بریدګر هم وژل شوي دي.»
دا برید په کور دننه او نړیواله کچه وغندل شو.ولسمشرۍ ماڼۍ، د ملي پخلاینې شورا، د ترکیې بهرنیو چارو وزارت، امریکې او برېتانیې سفارتونو، دغه راز په افغانستان کې د ایران سفارت، ملګروملتونو، اروپايي ټولنې، د سعودي عربستان شاهي حکومت، کاناډا او د بشري حقونو خپلواک کمېسیون دغه برید په کلکو ټکو غندلی او بشري جنايت يې بللی دی.
د همدې ورځې په شپه ولسمشرۍ ماڼۍ ددې بريد په تړاو،د لړم ۱۳مه، سه شنبه ورځ په ټول هېواد کې ملي ماتم اعلان کړ.
طالبانو په دې بريد کې خپل لاس لرل رد کړل، خو د ولسمشر لومړی مرستیال امرالله صالح بيا ددې پېښې پړه پر طالبانو واچوله؛ هغه په خپله فېسبوک پاڼه داسې ليکلې ؤ:
«د ملي امنیت ریاست او نورو چارواکو په وینا، له برید وروسته د پېښې په ځای کې، د ترهګرو لخوا پاتې شوې وسلې له هغه څه سره سمون نه خوري، چې د داعش ډلې د جعلي اعلامیې په عکسونو کې لیدل کېږي. د طالبانو په وینو لړلی بيرغ يو له هغو توکو څخه دی چې د ترهګرو له بکسوترلاسه شوي.دویپر دېوال لیکلي: «طالبان دې ژوندې وي!»
په ورته وخت کې د افغان مرکچي پلاوي مشر معصوم ستانکزي ددې پېښې په اړه ويلي: «که طالبان د خلکو د بې رحمانه وژلو پای ته رسولو ته ژمن وي باید ژر تر ژره اوربند وکړي او د افغانانو غاړو ته د دښمن ورسیدلي لاسونه لنډ کړي، هېڅوک نشي کولی، چې له داسې وژنو او تاوتريخوالي خپلې براات واخلي، دا د الله تعالی او د افغانستان د خلکو پر وړاندې یوه آزموینه ده.»
د افغانستان د سولېلپاره د امریکا ځانګړي استازي زلمي خلیلزاد پر کابل پوهنتون برید وحشیانه عمل بللی.
خلیل‌زاد پر خپلهټوېټر پاڼه لیکلي، «دا د دولت او طالبانو لپاره یو فرصت نه‌دی چې د یوه او بل پر وړاندې امتیاز واخلي!» د خلیلزاد له قوله، «دلته یو ګډ دښمن شته!!»
د راپورونو په اساس په دې خونړۍ پېښه کې چې د څو ساعتونو لپاره يې دوام وکړ، يوازې د کابل پوهنتون د عامه ادارې او پاليسۍ څخه ۱۳ محصلينو ژوند له لاسه ورکړ او ګڼ شمېر پکې ټپيان شوي دي.
په افغانستان کې پر ښوونيزو مرکزونو بريدونه نوې خبره نه ده، له دې وړاندې هم د هېواد په بېلابېلو ښوونيزو مرکزونو خونړي بريدونه شوي چې په پايله کې يې ګڼ شمېر زده کوونکي، محصلين او ښوونکي مړه او ټپيان شوي دي.