نــورسـتان کــې ۵۱۹ قلمه فرهنګي آثــار ترلاسه شول

دغه تاریخي اثار د نورستان ولایت د اسلامي دورې په لومړنیو کالونو پورې تړاو لري چې د چارواکو په خبره، تر ۴۰۰ کالونو پورې قدامت لري.
ددغه ولایت د اطلاعاتو او فرهنګ چارواکي وايي، له دغو اثارو ۷۳ د ننګرهار موزیم او پاتې نور کابل ته لېږدول شوي دي.
د نورستان ولایت د اطلاعاتو او فرهنګ رياست د چارواکو په وینا، دغه تاریخي اثار یوه سیمه يیز مشر راټول کړي وه چې د اطلاعات او فرهنګ ریاست او ولایت مقام په هڅو یې ترلاسه کړي.
د نورستان د اطلاعاتو او فرهنګ رئیس فضل الحق خالقیار وایې، هڅي یي پیل کړي، څو د نورستان لپاره ځانګړی موزیم جوړ کړي، چې ددې ولايت له نورو ولسوالیو څخه فرهنګي او تاریخي میراثونه هم راټول او خوندي شي.
د خالقیار په خبر دغه اثار د حاجي جمعه ګل له لوري له وانټ وایګل ولسوالۍ څخه را ټول شوي او په خپل کور کې یې خوندي ساتلي ؤ، چې د اطلاعاتو او فرهگ ریاست په هڅو پیدا او ترلاسه شول.
نوموړی وایي، په دې اثارو کې حکاکي شوې دروازې، کړکۍ او د خونو ستنې شاملې دي. د ښاغلي خالقيار په وينا د حاجی جمعه ګل کورني ته یې د دغو اثارو په بدل کې دوه میلونه افغانۍ ورکړي دي .
د اطلاعاتو او فرهنګ ریئس په خبره، دغو اثارو کې د نورستانیانو د ژوند، فرهنګ، هنر او د هغوی د دودونو ښودنه شوې ده چې په مختلفو شکلونو باندی جوړ شوي دي.
د خالقیار په وینا، نورستان د فرهنګي میراثونو له اړخه غني ولایت دی او هره ولسوالۍ یې یو جلا خزانه ده چې تر اوسه ورته لازمه پاملرنه نه ده شوې.
د افغانستان په ملي موزیم کې د اسلامي دورې د اثارو عمومي مسوول عبدالبصیر نادري وايي، له یاد ولایت څخه يې ۵۱۹ قلمه تاریخي اثار ترلاسه کړي، چې له ډلې يې ۷۳ قلمه د ننګرهار اطلاعاتو او فرهنګ ریاست ته، په سراج العمارت کې د نوي جوړېدونکي موزیم لپاره ورکړل شوي او پاتې نور به د کابل په موزیم کې کېښودل شي.
د يادونې وړه ده چې موده وړاندې نورستان د هېواد په کچه د ملي پارک په توګه اعلان شو. که ددې غرني ولايت د طبيعي ښکلاګانو ترڅنګ، غني فرهنګ ته يې هم پاملرنه وشي؛ نو د کورنیو سیلانیانو ترڅنګ به د بهرنيو سیلانیانو پام هم وروګرځي.