په ننګرهار کې د څلور زره ښـوونکـو ګمـارل

د پوهنې وزارت په ننګرهار کې ۴۰۰۰ ښوونکي په دنده ګماري، چې تازه يې دا بستونه آزادې سیالۍ ته وړاندې کړي دي. ددغه ولایت اوسېدونکو ددې پرېکړې تود هرکلی وکړ او په ټولنیزو پاڼو کې يې خوښۍ څرګندې کړې دي.
د ننګرهار د پوهنې رئیس حسیب الله شینواري له ۸صبح سره په مرکه کې وويل، چې د ښوونکو ګمارل د آزموینو د ملي کميټې له خوا ترسره کېږي، چې پاڼې به د ماشین په مټ ارزول کېږي.
حسیب الله شینواري زیاته کړه: «دا ښوونکي په هغو سیمو کې په دندو وګمارل کېږي، چې بې ځایه شوي او کډوال په کې دي او یا هم پخوا ډېره پاملرنه نه ده ورته شوې.»
د هغه په وینا، په ننګرهار کې شاوخوا ۷زره ښوونکو ته اړتیا ده، چې په دې څلور زره نوي تشکیل سره به د ښوونکو د کمښت ستونزه تر ډېره اواره شي.
د پوهنې رئیس وايي چې په ننګرهار کې د ښځینه زده کوونکو شمېر ته په پام سره درې زره ښځینه ښوونکو ته اړتیا ده، چې تازه بستونه يې ۵۵ سلنه ښځینه ښوونکو ته ځانګړي کړي دي.
اخوا، د ننګرهار والي ضیاءالحق امرخېل هم په خپل ټوېټر لیکلي چې په دې سره به په ننګرهار کې د ښوونکو د کمښت ستونزه حل شي.
د ننګرهار د پوهني رئیس د معلوماتو له مخې، په دې ولایت کې اوس مهال ټول ۹۰۴ ښوونځي فعالیت لري، چې شاوخوا ۴۰ سلنه يې ودانۍ نه لري.
شینواری وايي چې په دغو ښونځیو کې ۱۹۸ یوازې د نجونو او ۳۱۰ لومړني ښوونځي دي چې نجونې او هلکان په کې زده کړې کوي او ۳۹۶ ښوونځي هم د هلکانو لپاره دي.»
د معلوماتو له مخې، په ننګرهار کې په دولتي او شخصي ښوونځیو کې ټول کابو یو میلیون زده ‌کوونکي په زده کړو بوخت دي، چې ۳۸ سلنه يې نجونې دي.