۸صبح، کابل: په افغانستان کې د سره صلیب نړیوالې کمېټې ویلي، چې د بلخ ولایت له ۴۰۰ زيان ګالونکو ښځو سره یې نغدي مرسته کړې ده.
دغې ادارې يکشنبه د چنګاښ پر ۲۸مه، پر خپله اېکسپاڼه لیکلي چې دا مرستې د افغاني سرې میاشتې ټولنې په همکارۍ د بلخ ولایت د مرکز مزارشریف ښار امیندوارو او شیدې ورکوونکو ښځو ته وېشل شوې دي.
د سره صلیب نړیوالې کمېټې زیاته کړې، چې د دغو مرستو موخه د امیندوارو او شیدې ورکوونکو ښځو د بېړنیو اړتیاوو پوره کول او د هغوی او ماشومانو د تغذیې د وضعیت ښه کول دي.
په افغانستان کې له امیندوارو او شیدې ورکوونکو ښځو سره بشري مرستې داسې مهال کېږي، چې اقتصادي ناورين او د عایداتي فرصتونو کمښت ګڼې کورنۍ له سختو اقتصادي ستونزو او د خوړو له کمښت سره مخ کړې دي.
نړیوالو بنسټونو خبرداری ورکړی، چې په افغانستان کې ښځې او ماشومان د بشري ناورین له اغېزو تر ټولو ډېر زیان ګالونکي قشرونه دي.
