۸صبح، کابل: د اسیا او ارام سمندر لپاره د سره صلیب نړیوالې کمېټې سیمهییز مشر رژیس ساویوز ویلي چې د افغانستان په شمال کې وروستۍ زلزلې شته اقتصادي ستونزې، وچکالي او بشري بحران ژور کړی دی.
نوموړي چهارشنبه د لړم پر ۱۴مه ویلي چې په افغانستان کې ځينې وګړي له دوو میاشتو په کمه موده کې د دوو زورورو زلزلو له کبله له ډېرو زیانونو سره مخ شوي دي.
رژیس ساویوز زیاته کړې: «کورنۍ دا وار په نیمه شپه کې د چتونو په پریوتو او د هر څه له لاسه ورکولو سره مخ شوې. دغو ویجاړیو شته اقتصادي ستونزې، وچکالي او بشري بحران لا پسې ژور کړی دی.»
د نوموړي په خبره، له افغان سرې میاشتې سره یو ځان د سره صلیب ډلې په بلخ، کندوز او سمنګان کې زلزله ځپلو ته روغتیايي خدمات او بېړنۍ مرستې وړاندې کوي.
هغه دغه راز ټينګار کړی چې دا کمېټه له ځايي طالب چارواکو سره په اړیکه کې ده څو په محلي زندانونو کې د بندیانو امنیت او هوساینه خوندي شي.
د سره صلیب دغه چارواکي ویلي: «موږ له هغو کسانو سره یو چې د کورنۍ غړي، خپلوان، کورونه او د عاید سرچینه یې له لاسه ورکړې ده.»
اخوا د کډوالۍ نړیوال سازمان اعلان کړی چې د افغانستان په شمال کې د وروستۍ زلزلې په پایله کې په پنځو ولایتونو کې ۵۱۲ کورنۍ زیانمنې شوې دي.
پرون د طالبانو عامې روغتیا وزارت اعلان کړی و چې د افغانستان په شمال کې د وروستۍ زلزلې له کبله ۲۷ کسان مړه او ۹۵۶ کسان ټپيان شوي دي.
