د ختیځ زون ديني عالمانو، قومي مخورو او یو شمېر مېرمنو نن د ننګرهار مرکز جلال اباد ښار کې د يوې ستره غونډهې پر مهال پر وسلهوالو طالبانو غږ وکړ چې د افغان وژنې د مخنیوي په موخه دې په هېواد کې د اوربند په کولو سره جګړه بس کړي.
ديني علماوو او قومي مخورو پر وسلهوالو طالبانو غږ وکړ چې په ټول هېواد کې سراسري اوربند وکړي او د بین الافغاني خبرو له لارې دې ستونزې حل کړي. ويناوالو په خپلو خبرو کې وويل چې، جګړه هېڅ ګټونکی نه لري او یوازې د افغانانو د وژنې او د هېواد د ورانۍ لامل کیږي.
د ننګرهار والي ضیاالحق امرخېل يادې غونډې ته د وينا پر مهال وويل چې، د نړۍ سترو ديني عالمانو اوسنۍ جګړه ناروا او حرامه بللې او غږ یې پورته کړی چې افغان وژنه دې بس شي، نو له همدې امله هېڅ دلیل نشته چې اوسنۍ تپل شوې جګړې ته دې د جهاد نوم ورکړل شي.
د ننګرهار والي خواشیني وښوده چې وسلهوال طالبان له بهرنیانو سره خبرو ته کښېني، خو افغان وژنې ته دوام ورکوي. هغه پر وسلهوالو طالبانو غږ وکړ چې د علماؤ په منځګړیتوب دې د خبرو اترو لپاره ځای په نښه کړي او اوربند دې وکړي.
د افغانستان ديني علماؤ او مذهبي مشرانو ترڅنګ د اسلامۍ نړۍ سترو مذهبي مشرانو او عالمانو هم څو څو ځلې په خپلو څرګندونو کې د افغانستان روانه جګړه ناروا بللې او د افغان وژنې د درېدو غوښتنه يې کړې ده. څو ورځې وړاندې د مصر ستر مفتي، دکتور شوقي ابراهیم علام په افغانستان کې روانه جګړه حرامه او ناروا وبلله. نوموړي ويلي ؤ چې د قرانکریم او نبوي احاديثو په استناد د افغانستان جګړه او د وګړو وژنه ناروا عمل دی.
دا په داسې حال کې ده چې د بين الافغاني مذاکراتو پروسې په ټپه درېدو او د هېواد په ګوټ ګوټ کې د جګړې او تاوتريخوالي له امله هره ورځ عام وګړي وژل او ټپيان کېږي چې دغې چارې د افغاني ټولنې د نورو برخو ترڅنګ عام وګړي هم اندېښمن کړي دي.
