۸صبح، کابل: د ملګرو ملتونو د ښځو څانګې اجرایوي مدیرې سیما باهوس د افغانستان لپاره د ملګرو ملتونو د سرمنشي د ځانګړې استازې او د یوناما د نوې مشرې په توګه د رباب فاطمې د ټاکل کېدو هرکلی کړی دی.
باهوس شنبه د وږي پر ۲۸مه، رباب فاطمې ته د نوي مسوولیت پر مبارکۍ سربېره ویلي چې په دې حساس وخت کې به د افغان ښځو او نجونو د حقونو، غږ او رهبرۍ د ملاتړ لپاره له هغې سره پوره همکاري وکړي.
رباب فاطمه په دې وروستیو کې د افغانستان لپاره د ملګرو ملتونو د سرمنشي ځانګړې استازې او په افغانستان کې د ملګرو ملتونو د مرستندوی پلاوي (یوناما) د مشرې په توګه ټاکل شوې ده.
نوموړې تر دې وړاندې هم د ملګرو ملتونو په بېلابېلو ډیپلوماټیکو او اجرایوي برخو کې دندې ترسره کړې دي.
