۸صبح، تخار: تخار کې ځايي سرچینې وايي، چې د احمد مسعود په مشرۍ د مقاومت جبهې کسانو د دغه ولایت په بهارک ولسوالۍ کې د طالبانو پر یوې پوځي قرارګاه برید کړی دی.
دغې سرچینې ۸صبح ورځپاڼې ته وویل، دا برید یکشنبه د مرغومي پر ۲۶ د تخار ولایت د بهارک ولسوالۍ د «حمدالله معاویز» په نامه د طالبانو پر یوې قرارګاه شوې دی.
د یادې سرچینې په خبره، دې برید کې درې طالب ځواکونه وژل شوي او څلور نور ټپيان شوي دي.
سرچینې زیاته کړې، چې مولوي حمدالله معاویز د طالبانو د سرپرست حکومت د بهارک ولسوالۍ د استخباراتو مدیر دی.
له بلې خوا د تخار د والي ویاند خان زرین منهاج له ۸صبح ورځپاڼې سره په خبرو کې دا ادعا بې اساسه بللې او رد کړې يې ده.
منهاج زیاته کړه، چې د دغه ولایت د امر بالمعروف او نهی عنی المنکر پر قرارګاه لاسي بم غورځول شوی، خو چا ته پکې زیان نه دی اوښتی.
