د نړیوالو رسنیو د راپورونو له مخې، یوه لوړپوړي ایراني چارواکي ویلي چې که امریکا خپلو بريدونو ته دوام ور نه کړي، نو ايران به هم خپل پوځي عملیات ودروي.
رویټرز يکشنبه د جولای پر ۲۶مه، د یوه لوړپوړي ایراني چارواکي له قوله راپور ورکړی چې ایران به خپل بریدونه هغه مهال ودروي چې امریکا هم ورته اقدام وکړي.
دا څرګندونې په داسې حال کې کېږي چې د امریکا ولسمشر ډونالډ ټرمپ خپل پوځ ته پر ایران د بریدونو د درولو امر کړی دی.
پر ایران د امریکا د ۱۳ شپو له هوايي بریدونو وروسته، پنټاګون د جمعې ورځې په وروستیو کې دغه عملیات درولي او تر اوسه د شنبې او یکشنبې په ورځو کې د امریکا د کوم تازه برید راپور نه دی ورکړل شوی.
په همدې حال کې د ایران د بهرنیو چارو وزارت هم ویلي چې د تهران او واشنګټن ترمنځ د پیغامونو تبادله روانه ده، خو ټینګار یې کړی چې د ايران اسلامي جمهوریت اوسنی لومړیتوب د ایران د حاکمیت، ځمکنۍ بشپړتیا او خلکو دفاع ده، نه له امریکا سره خبرو ته کېښناستل.
