په نیویارک کې امریکايي او ایراني مذاکره کوونکي د جګړې د پای ته رسولو لپاره پر خبرو بوخت دي چې له مخې به یې ایران هرمز تنګی پرانېزي او امریکا به سمندري کلابندي لغوه کوي.
رویټرز پنجشنبه د سپټمبر پر ۲۴مه راپور ورکړی چې دا طرح د ارزونې په پړاو کې ده او هرمز تنګی د نږدې اووه میاشتنۍ جګړې د پای ته رسولو لپاره د دواړو غاړو ترمنځ د خبرو مهمه وسیله ګرځېدلې.
مذاکراتو ته د نږدې سرچینو په خبره، ایران غواړي اقتصادي کلابندي پای ته ورسېږي او کنګل شویو شتمنیو ته لاسرسی ومومي، په داسې حال کې چې امریکا غواړي له هرمز تنګي د بېړیو ازاد تګ راتګ بېرته پیل شي.
یوه جګپوړي ایراني چارواکي ویلي چې د دغې جګړې د پای ته رسولو غوره لار یو مرحلهيي تړون دی چې له مخې به یې ایران د امریکا د اقتصادي کلابندۍ د ختمېدو او خپلو کنګل شویو شتمنیو ته د لاسرسي په بدل کې له هرمز تنګي څخه د بېړیو د تګ راتګ اجازه ورکړي.
ویل کېږي چې د مذاکره کوونکو لپاره اصلي ننګونه یوازې د تړون ترلاسی نه دی، بلکې د دواړو غاړو له امتیازاتو د ډاډ ترلاسی او د باور رامنځته کول دي.
