۸صبح، کابل: د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنټ په بلخ او سمنګان کې له زلزله ځپلو سره خواخوږي ښودلې ده.
بېنټ دوشنبه د لړم پر ۱۲مه په خواله شبکې اېکس کې د افغانستان په شمال کې د ویجاړونکې زلزلې له ځپل شویو کسانو سره د سملاسي بشري غبرګون او ملاتړ غوښتنه کړې دي.
نوموړي ټينګار کړی چې له زلزله ځپلو سره دې بېړنۍ او بشردوستانه مرستې د بشري حقونو او جنسیتي مسایلو په پام کې نیولو سره وشي.
د روغتیا نړیوال سازمان (WHO) اعلان کړی چې له زلزلې وروسته د دغه بنسټ ژغورنډلې له بېړنیو او ژوند ژغورونکو تجهیزاتو سره د بیګانۍ شپې د زلزلې سیمې ته لېږل شوې دي.
دا په داسې حال کې ده چې بیګاه د ریښتر په کچه ۶.۳ درجې زلزلې د کابل په ګډون د افغانستان شمالي ولایتونه ولړزول.
د راپورونو له مخې، په دې طبیعي پېښه کې ۲۰ کسان مړه او ۵۳۴ نور ټپيان شوي دي.
