۸صبح، کابل: د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ د نړیوالې جنايي محکمې پر وړاندې د امریکا د بندیزونو د سملاسي لرې کېدو غوښتنه کړې او د افغانستان د حالت په اړه یې د دې محکمې د څېړنو پر دوام ټینګار کړی دی.
بېنېټ شنبه د تلې پر ۱۸مه په اېکسپاڼه کې لیکلي چې د نړیوالې جنايي محکمې پر وړاندې د امریکا د بندیزونو په غندلو کې د ملګرو ملتونو د بشري حقونو له عالي کمېشنر ولکر ترک سره همغږی دی.
هغه د ټولو دغو بندیزونو د سملاسي لرې کېدو غوښتنه کړې او ویلي یې دي چې لا هم د افغانستان په اړه د نړیوالې جنايي محکمې د څېړنو ملاتړ کوي.
نوموړي ډاډ څرګند کړی چې د دې محکمې څېړنې به دوام مومي او د امریکا بندیزونه به یې د پرمختګ مخه ونه نیسي.
دا په داسې حال کې ده چې د ملګرو ملتونو د بشري حقونو عالي کمېشنر ولکر ترک د نړیوالې جنايي محکمې پر وړاندې د امریکا بندیزونه د نه منلو وړ بللي او د لرې کېدو غوښتنه یې کړې ده.
