د ملګرو ملتونو د بشري حقونو عالي کمېشنر ولکر ترک د امریکا له لوري پر نړیوالې جنايي محکمې لګول شوي بندیزونه د نه منلو وړ بللي او د لرې کېدو غوښتنه یې کړې ده.
ترک جمعه د اکتوبر پر ۹مه ویلي چې دا بندیزونه دې د هغو کسانو پر فعالیتونو منفي او وېروونکی اغېز نه کوي چې د عدالت د خوندیتوب لپاره له دغې محکمې سره همکاري کوي.
نوموړي د نړیوالې جنايي محکمې د روم اساسنامې له ۱۲۵ غړو هېوادونو غوښتي چې د دغې ادارې د خوندیتوب او فعالیتونو د دوام د تضمین لپاره بېړني اقدامات وکړي.
د ملګرو ملتونو د بشري حقونو عالي کمېشنر له هغو هېوادونو هم چې تر اوسه له دغې محکمې سره نه دي یوځای شوي، غوښتي چې د محکمې د خپلواکۍ او فعالیتونو درناوی وکړي.
دا په داسې حال کې ده چې امریکا د ۲۰۲۵ کال له فبرورۍ راهیسې د نړیوالې جنايي محکمې د ۱۸ قاضیانو پر نیمايي، د دغې محکمې پر پخواني څارنوال، دوو مرستیال څارنوالانو او یوه لوړپوړي کارکوونکي بندیزونه لګولي دي.
ولکر ترک ټینګار کړی چې له مجازاتو خلاصون تاوتریخوالي او کړاوونه زیاتوی، نړیواله ټولنه دې د هغو کسانو د مجازاتو پر ځای چې د بشري حقونو لویې سرغړونې مستندوي، د عدالت د خوندیتوب او حسابورکولو د پیاوړتیا لپاره ډېرې هڅې وکړي.
