د امریکا د بهرنیو چارو وزیر مارکو روبیو د اوو سترو صنعتي هېوادونو «جي۷» د غونډې په څنډه کې د فرانسې او جرمني د بهرنیو چارو له وزیرانو سره لیدلي او پر منځني ختیځ، د بېړیو پر امنیت او سوداګریزو اړیکو یې خبرې کړې دي.
فاکس نیوز دوشنبه د نومبر پر ۹مه راپور ورکړی چې روبیو د فرانسې د بهرنیو چارو له وزیر ژاننویل بارو سره په لیدنه کې د جرمونو له نړیوالې محکمې د امریکا پر اندېښنو، د منځني ختیځ پر وضعیت او په اروپا کې د امریکايي شرکتونو پر ستونزو بحث کړی دی.
نوموړي د جرمني د بهرنیو چارو له وزیر یوهان وادفول سره د بېړیو پر ازاد تګ راتګ، دفاعي همکاریو او د دواړو هېوادونو ترمنځ د سوداګریزو اړیکو د پراختیا په اړه خبرې کړې دي.
روبیو د اتلانتیک سمندر په دواړو غاړو کې د سولې او امنیت د خوندیتوب لپاره له جرمني سره همکاري مهمه بللې ده.
د امریکا د بهرنیو چارو وزیر د اوو سترو صنعتي هېوادونو غونډې کې هم د سیمهییز امنیت پرضد ګواښونو سره پر مبارزې ټینګار کړی او ویلي یې دي چې واشنګټن له خپلو متحدانو سره په ګډه هڅه کوي د نړۍ په بېلابېلو برخو کې امنیتي او بشري ننګونې حل کړي.
