د روسيې د بهرنيو چارو وزير: مسکو د «طالبانو د امارت» له بېـرته راتـګـه ملاتـړ نـه کوي

د روسيې د بهرنيو چارو وزير وايي چې هېواد يې د طالبانو له امارت څخه ملاتړ نه کوي او له تور لېسته د دغې ډلې د مشرانو د نومونو ايستلو لپاره هم د سولې مذاکراتو کې پرمختګ ته اړتيا ده.
د هېواد د بهرنيو چارو وزير محمد حنيف اتمر مسکو ته په سفر کې له خپل روسي سيال سرګي لاوروف سره وکتل. د افغانستان او روسيې د بهرنيو چارو وزيرانو د روان کال د کب په اتمه نېټه د خپلو خبرواترو پايلې په خبري ناسته کې اعلان کړې.
دواړو لوريو په دې ناسته کې د دوه اړخيزو همکاريو او سولې، سياسي، اقتصادي او کلتوري برخو کې د دوه اړخيزو اړيکو پر پراختیا ټینګار وکړ.
د بهرنيو چارو وزارت د اعلاميې په اساس لاوروف ويلي چې هېواد يې د طالبانو د امارت له بېرته راتګ څخه ملاتړ نه کوي. روسيې له دې مخکې هم ويلي ؤ چې په افغانستان کې د طالبانو د واکمنۍ له بېرته راتګه ملاتړ نه کوي.
نوموړي همداراز ويلي چې له تور لېسته د طالبانو نومونو د ايستلو لپاره په مذاکراتو کې لازمو پرمختګونو ته اړتيا ده. که څه هم مسکو ځينې وختونه د طالبانو تود کوربه ‌توب کړی، خو د دې هېواد د بهرنيو چارو وزير ويلي چې له طالباني نظامه ملاتړ نه کوي.
د افغانستان د بهرنيو چارو وزير هم ويلي چې، کابل د سولې په برخه کې پر خپلو کړو ژمنو عمل کړی او تمه لري چې طالبان هم خپلې اساسي ژمنې عملي کړي.
محمد حنيف اتمر د طالبان د امارت او له تور لېسته د دې ډلې د مشرانو د نومونو ايستلو په اړه د روسيې له دريځه هرکلی کړی دی. د هېواد د بهرنیو چارو وزیر ويلي چې افغانستان او روسيه له ګډو ګواښونو سره مخامخ دي او دواړه هېوادونه بايد له خپلو ګډو سرچينو د دغو ګواښونو د لیرې کولو لپاره کار واخلي. اتمر همداراز د ښاغلي لاوروف په وسيله د روسيې ولسمشر ولاديمير پوتين ته د ولسمشر غني پيغام سپارلی دی. د بهرنيو چارو وزير وويل چې ولسمشر غني په سياسي، اقتصادي او کلتوري برخو کې د دواړو هېوادونو د مناسباتو او اړيکو د پياوړتيا غوښتونکی دی.
حنیف اتمر له خپل روسيې سيال سره د ترهګرۍ، توندلارۍ، نشه يي توکو د قاچاق او له نړيوالو جنايتونو سره د مبارزې په هکله د دوه اړخيزو همکاريو د ټينګښت په اړه خبرې اترې کړې دي.
افغانستان او روسيې هوکړه کړې چې د دوه اړخيزو همکاريو لپاره پر يوې هراړخیزې نقشې کار وکړي.