د افغانستان زعفرانو لومړی ځای خپل کړ

د صنعت او سوداګرۍ وزارت اعلان کړی چې د افغانستان زعفران د نړۍ په کچه تر ټولو ښه کیفیت لرونکي وبلل شول.
ددغه وزارت په وینا، د افغانستان زعفران په ۲۰۲۱ میلادي کال کې د اروپايي ټولنې د ذایقې انستیتوت د درېیو طلايي ستورو لومړۍ جایزه ترلاسه کړې ده.
د صنعت او سوداګرۍ وزارت ویاند فواد احمدي ۸صبح ته ووېل چې دا جایزه د افغانستان په استازیتوب کیهان زعفران کرنیز شرکت ته ورکړل شوه.
د هغه په وینا، د اروپايي ټولنې د ذایقې نړیوال انستیتوت په بروکسل ښار کې دی او په نړیواله کچه د خوراکي محصولاتو د خوند او کیفیت په برخه کې یو معتبر نړیوال بنسټ ګڼل کېږي. د هغه په وینا، د نوموړي بنسټ د درېیو طلايي ستورو جایزه له نړیوال اعتباره برخمنه ده.
احمدي وایي چې په ۲۰۲۱ زېږدیز کال کې د افغانستان زعفرانو ته د عالي طبیعي کیفیت له امله ددغه بنسټ جایزه کیهان کرنیز شرکت ته ورکړل شوه.
د صنعت او سوداګرۍ وزارت ویاند زیاته کړه چې کیهان کرنیز شرکت د ذایقې د نړیوال انستیتوت د طلايي ستورو جایزې په اخیستو سره له دې وروسته کولی شي پر خپلو محصولاتو ددغه بنسټ نښان ولګوي او په نړیواله کچه یې وکاروي.
د ذایقې یا خوند د آزموینې نړیوال انستیتوت په ۲۰۰۳ کال کې په بروکسل ښار کې جوړ شوی او له هغه وخت راهیسې هر کال د سلګونه ډوله خوراکي توکو خوند آزمویي.