د ماشومانو ژغورنې سازمان ویلي چې تر اوسه په غزه کې لږ تر لږه ۲۱ زره ماشومان تري تم دي.
یاد سازمان دوشنبه د جون پر ۲۴مه په یوه خپاره کړي راپور کې لیکلي چې په دغو ماشومانو کې ۱۷ زره یې بېسرپرسته او جلا شوي او څلور زره یې تر خاورو لاندې ښخ شوي دي.
نوموړي سازمان زیاته کړې چې ډېری ماشومان د غزې جګړې په ګډوډۍ کې ورک دي، ډیری یې تر خاورو لاندې ګیر شوي، نیول شوي، په بې نښو قبرونو کې ښخ کړل شوي یا له خپلو کورنیو ورک دي.
د راپور په حواله، له کورنیو جلا شوي یا بېسرپرسته ماشومان بېړنۍ ساتنې ته اړتیا لري.
بل پلو، په غزه کې د ماشومانو د ژغورنې یو کارپوه ویلي: «موږ هره ورځ بېسرپرسته ماشومان پیدا کوو او د هرې ورځې په تېرېدو ترې ملاتړ سختېږي.»
نوموړي زیاته کړې: «موږ له خپلو شریکانو سره د جلا شویو او له سرپرست پرته ماشومانو د پېژندنې لپاره کار کوو او کورنیو پسې یې ګرځو؛ خو هغوی ته د امن اوسېدو لپاره هېڅ ډول اسانتیاوې نه شته او په غزه کې هېڅ ځای امن نه دی.»
د یادونې ده چې له دې وړاندې ملګرو ملتونو اسراییلی پوځ د هغو دولتونو او وسلهوالو ډلو په نوملړ کې شامل کړی و چې د ماشومانو له حقونو سرغړونې کوي.
