د ماشومانو د ژغورنې سازمان (Save the Children) ویلي چې افغانستان ته د ۴۰۰ زره ماشومانو په ګډون د شاوخوا ۶۷۵ زره کسانو د درملنې لپاره ۹۲ ټنه درمل راورسېدل.
د ماشومانو ژغورنې ادارې سهشنبه د غويي پر ۱۱مه په یوې خپرې کړې ویناپاڼه کې ویلي چې دغه درمل په روان کال کې د تنفسي او شري ناروغۍ له زیاتوالي وروسته افغانستان ته رالېږل شوي دي.
نوموړي سازمان زیاته کړې چې د روان زېږدیز کال په لومړیو څلورو میاشتو کې له پنځو کلونو کم عمره څه باندې زر ماشومان د تنفسي ناروغیو له امله مړه شوي دي.
په ویناپاڼه کې راغلي: «په تېرو درېیو میاشتو کې د ماشومانو ژغورنې ادارې ګرځنډلې چې په اتو ولایتونو کې کار کوي، پر تنفسي ناروغۍ اخته د نږدې ۶۹ زره ماشومانو درملنه کړې ده.»
بل پلوه، په افغانستان کې د ماشومانو ژغورنې ادارې رییس ارشد مالک ویلي: «په افغانستان کې ډېری ماشومان د درملنې وړ ناروغۍ له کبله مري. دغو درملو سره به د هېواد په لرو پرتو سیمو کې د څه باندې ۴۰۰ زره ماشومانو درمنله وشي.»
نوموړي سازمان د دغو درملو ارزښت څه د پاسه ٥٩٠ زره امریکايي ډالره بللی چې د هالنډ مرستندويه سازمان(DRA)، د اروپايي ټولنې د بشري مرستو(ECHO)، د جرمني بهرنيو چارو وزارت او د امريکا نړيوالې پراختيايي ادارې او یو شمیر نورو سازمانونه لخوا ورکړل شوي دي.
له دې وړاندې د روغتیا نړیوال سازمان ویلي و چې په افغانستان کې پام وړ روغتیايي چوپړتیاوو ته نه لاسرسی یوه لویه ننګونه ده.
نوموړي سازمان زیاته کړې چې په افغانستان کې ۱۸ میلیونه کسان روغتیايي مرستو سره تړلي دي.
د یادونې ده چې د ماشومانو ژغورنې سازمان له ۱۹۷۶ کال راپدېخوا د افغانستان په ګوټ ګوټ کې له ماشومانو او ټولنې ملاتړ کوي.
