۸صبح، کابل: د افغانستان په اړه د منځنۍ اسیا د هېوادونو د ځانګړو استازو د سیمهییز تماس ډلې دویمه غونډه د قرغزستان په پلازمېنه بشکیک کې جوړه شوې ده.
د قازاینفورم خبري اژانس شنبه د لړم پر ۱۶مه، راپور ورکړی چې په دې غونډه کې د قزاقستان استازي د افغانستان د سولې او امنیت د ملاتړ لپاره د سیمهییزې همغږۍ پر پیاوړتیا ټینګار کړی دی.
له افغانستان سره د سوداګریزو، اقتصادي، ترانسپورټي، لوژستیکي او بشري همکاریو پراختیا هم د دې غونډې له نورو مهمو موضوعاتو وه.
ګډونوالو همداراز د دوهاړخیزو اقتصادي همکاریو پر پراختیا، د سیمهییز اتصال پر ښهوالي او د ګډو پروژو پر پلي کولو ټینګار کړی، څو په سیمهییزو اقتصادي بهیرونو کې د افغانستان ادغام اسانه شي.
