د سولې مذاکراتو دوهم پړاو؛ په دې پړاو کې تر ډېره د جګړې پر بندولو بحث کېږي

د افغان دولت مرکچي پلاوی د بین الافغاني مذاکراتو د دوهم پړاو لپاره د سه شنبې په ورځ په ورځ قطر ته ورسېد او ټاکل شوې په دې پړاو کې د دولت مرکچي پلاوی د نورو موضوعاتو ترڅنګ د جګړې پر بندولو خبرې وکړي.
د ملي روغې جوړې عالي شورا وايي چې د مذاکراتو په دوهم پړاو کې به تر ډېره په افغانستان کې د جګړې پر بندولو او د اوربند پر ټینګښت بحث وشي.
له دوحې څخه د رپوټونو له مخې، د افغان دولت او طالبانو د مرکچي پلاویو مقدماتي ناسته د چهارشنبې په ماښام ترسره شوه او پرېکړه وشوه چې د شنبې په ورځ د دواړو لوریو له خوا د اجنډا د موضوع ګانو په اړه خبرې پيل شي.
په قطر کې د سولې له خبرو سره هم مهاله په افغانستان کې جګړې او تاوتریخوالي زور اخیستی او د په بېلابېلو ولایتونو کې د جګړو او د په پلازمیني کې د هدفي وژنو او چاودنو له امله ګڼ شمېر ملکي کسان مړه او ټپيان شوي دي.
د ملي روغې جوړې د عالي شورا ویاند فریدون خوځون وايي چې په افغانستان کې د ټولنې له بېلابېلو پرګنو سره په سلا مشورو کې د جګړې د بندولو غوښتنه شوې .
د افغان دولت د مرکچي پلاوي مشر معصوم ستانکزي ویلي چې دوی هیله من دي د خبرو په دوهم پړاو کې دواړه لوري د جګړې پر بندولو سره سلا شي.
د افغان دولت او طالبانو مرکچي پلاویو د سپټمبر په ۱۲مه په قطر کې د سولې خبرې پیل کړې، چې تر درېیو میاشتو بحثونو وروسته د خبرواترو پر کړنلار او مقدمې هوکړه وشوه، چې وروسته د درېیو اوونیو لپاره دواړو لوريو د سلامشورو لپاره دا خبرې ودرولې.