امنيتي چارواکي: کـه طالـبان سـول ونـه کړي، د ځپلو لپاره يـې چمتو یو

د امنیتي بنسټونو لوړپوړو مسوولينو په يوه خبري ناسته کې اعلان وکړ چې سوله د دولت او د افغانستان د خلکو غوښتنه ده، خو که د طالبانو ډله جګړه انتخاب کړي، نو ددې ډلې پروړاندې یې جګړې ته هم چمتووالی نيولی دی.
د ملي امنيت شورا سلاکار حمدالله محب، د کورنيو چارو وزير مسعود انداربي، د ملي دفاع وزارت لومړی مرستيال شاه محمود مياخېل او د کورنيو چارو وزارت لوی امنيتي مرستيال عبدالصبور قانع د روان کال د سلواغې په اتلسمه، په خبري ناسته کې اعلان وکړ چې، که د سولې مذاکرات بريالي نشي نو امنيتي ځواکونه د طالبانو پروړاندې جګړې ته چمتووالی لري.
د ملي امنيت شورا سلاکار حمدالله محب په دغه خبري ناسته کې وويل چې، افغان دولت هر وخت سولې ته «ژمن او حاضر» دی او د همدې موخې لپاره يې د دولت مرکچي پلاوی قطر ته استولی دی.
نوموړي وويل: د دې لپاره چې د مذاکراتو د نه بريالي کېدو پړه د افغانستان پر دولت وانه چول شي، نو سره له دې چې طالبانو د مذاکراتو مېز تش پريښی خو د دولت مرکچي پلاوی بيا هم او لا تراوسه په دوحه کې دی.
محب، طالبان په ناموجه پلمو لټولو تورن کړل او ويې ويل چې دا ډله نه غواړي سوله وکړي او په همدې دليل امنيتي ځواکونه جګړې ته چمتووالی لري. نوموړي وويل، که طالبان سوله ونه کړي، نو امنيتي ځواکونه مجبور دي چې له هېواد او خاورې «سپېڅلې دفاع» وکړي.
د ملي امنيت شورا سلاکار وويل چې، طالبان قدرت او د نظام نړېدل غواړي او قدرت ته د رسېدو لپاره که اړتيا وي نو ټول افغانستان به هم ويجاړ کړي. نوموړي د طالبانو ډله يو «ظالم قوت» او د پرديو د لاس آله وګڼله چې د نوموړي په تعبير «بادارن يې» نه غواړي افغانستان ثبات او سوکالۍ ته ورسېږي او طالبانو ته اجازه نه ورکوي چې سوله وکړي.
محب همداراز وويل چې، د سيمې هېوادونه هم د افغانستان په اړه اندېښمن دي او طالبانو ته يې پرېکنده ځواب ورکړی چې بايد سوله وکړي او په سیمه کې هېڅ هېواد د طالبانو امارت نه غواړي.
د ملي امنیت شورا سلاکار وويل چې، طالبانو هېڅکله جګړه نه ده درولې، چې د بيا پيلولو لپاره دې خبرداری ورکړي. د نوموړي په وينا د سږني کال د ژمي په جګړه کې دولتي ځواکونو او خلکو ته درانه تلفات اوښتي دي.
محب وويل چې، «طالبان له افغان وژنې» لاس نه اخلي او هر چېرته چې يې وس ورسېږي د ټولنې له بېلابېلو پرګنو قرباني اخلي.
په دغه خبري ناسته کې مسعود انداربي وويل چې، طالبان د هېڅ ښار او ولايتونو د مرکزونو د سقوط ظرفيت او وړتیا نلري او په کندهار کې يې چې په وروستیو کې کومه جګړه پيل کړې، د جنګياليو له کمښت سره مخ شوي دي. اندرابي وويل چې طالبانو په کندهار کې له نورو ولايتونو جنګيالي غوښتي چې دغه جنګيالي په سخت ځپل شوي او درانه تلفات ورته اوښتي دي.
انداربي خبرداری ورکړ که طالبان جګړه انتخاب کړي، نو د دوی د ځپلو لپاره کلک تیاری نيول شوی دی.
د ملي دفاع وزارت لومړي مرستيال، شاه محمود مياخېل په دې ناسته کې وويل چې طالبان د «محاسبوي تېروتنې» سره مخ شوي ؤ او فکر يې کاوه چې کولی شي د جګړې او تاتريخوالي د ډېروالي له لارې په مذاکراتو کې امتياز ترلاسه کړي، خو ماته يې وخوړله.
د نوموړي په وينا، د دې ډلې مرکچي پلاوی د مذاکرې له مېزه تښتېدلی او داسې ښکاري چې د سولې اراده نلري. مياخېل خبرداری ورکړ چې دولت سوله غواړي او که طالبان جګړه وغواړي، نو امنيتي ځواکونه جګړې ته چمتو دي.
دا په داسې حال کې ده چې د مذاکراتو د کاري کړنلارې پر سر له هوکړې وروسته د سولې خبرې اترې د روان زېږديز کال په جنورۍ مياشت کې، په امريکا کې د نوي حکومت له رامنځته کېدو سره هم مهاله پيل شي، خو تر دې دمه يې د پيلېدو څرک نشته او داسې ښکاري چې طالبانو د مذاکراتو پيلېدو ته لېوالتيا نه ده ښودلې.