د پاکستان لومړي وزیر شهباز شریف د عمران خان په مشرۍ له تحریک انصاف ګوند سره د مذاکرې او خبرواترو لپاره یوه کمېټه جوړه کړې ده.
ایکسپرېسټریبیون یکشنبه د ډېسمبر پر ۲۲مه راپور ورکړی چې دا کمېټه د پاکستان د ملي شورا مشر سردار ایاز صادق د وړاندیز له مخې جوړه شوې ده.
د پاکستان د بهرنیو چارو وزیر اسحاق ډار، رانا ثناءالله او سناتور عرفان صدیق په دې کمېټه کې شامل دي.
په راپور کې راغلي چې ټاکل شوې د تحریک انصاف ګوند او د واکمن ګوندونو ایتلافي کمېټې نن (دوشنبه) د لومړي ځل لپاره د سردار ایاز صادق په کوربهتوب لیدنه او خبرې وکړي.
د یادونې ده چې د تحریک انصاف ګوند او د شهباز شریف په مشرۍ د واکمن ایتلافي دولت ترمنځ ترینګلتیا د څو اوونیو مخکې له اعتراضونو وروسته خپل اوج ته رسېدلې ده.
په دې اعتراضونو کې د تحریک انصاف ګوند پلویانو او د پاکستان د امنیتي ځواکونو په ګډون لسګونه کسان وژل شوي او او ټپیان شوي وو.
