په پاکستان کې له وروستیو «خونړیو» بریدونو وروسته د دغه هېواد لومړي وزیر شهباز شریف خبرداری ورکړی چې د اسلاماباد له مخالفو وسلهوالو ډلو سره به نرمښت او مذاکره ونه شي.
شریف سېشنبه د اګست پر ۲۷مه په بلوچستان ایالت کې وروستیو بریدونو ته په اشارې د خپلې کابینې په غونډه کې ویلي چې اسلاماباد به له خپلو «دښمنانو» سره هېڅ ډول جوړجاړی ونه کړي.
د پاکستان یاد لوړپوړي چارواکي یو ځل بیا پر خپل پخواني دریځ ټینګار کړی او په وینا یې، د طالبانو تر واک لاندې د افغانستان خاوره د اسلاماباد د وسلهوالو له خوا کارول کېږي.
هغه زیاته کړې: « د هغو کسانو لپاره لاره چې اساسي قانون او د پاکستان بیرغ په رسمیت پېژني خلاصه ده، خو له دښمن او د دښمن له ملاتړي سره به هېڅکله جوړجاړی ونه شي.»
د ډان ورځپاڼې د راپور پر بنسټ، د پاکستان لومړي وزیر ټینګار کړی چې د دغه هېواد د دولت مخالفانو د ځپلو وخت رارسېدلی دی.
دا څرګندونې په داسې حال کې کېږي چې تېره ورځ (دوشنبه، د اګست ۲۶مه) بلوچستان او خیبر پښتونخوا ایالتونه د دغه هېواد د دولت ضد وسلهوالو له خوا د «خونړیو» بریدونو شاهدان وو.
په دې بریدونو کې د ملکيانو په ګډون لږ تر لږه ۵۰ کسان وژل شوي دي.
د پاکستان پوځ اعلان کړی چې د دې بریدونو په ځواب کې یې په بلوچستان کې ۲۱ وسلهوال وژلي دي.
د پاکستان دولت په دغه ایالت کې د وروستیو ناامنیو پړه پر بلوڅ بېلتونغوښتونکي اچوي.
