۸صبح، خوست: وروسته تر دې چې طالبانو د خوست د شېخ زاید پوهنتون ۱۷ استادان له دندو ګوښه کړل، اوس سرچینې وايي چې دغې ډلې د ۳۲ نورو استادانو د لرې کولو لېست هم چمتو کړی دی.
سرچینو پنجشنبه د مرغومې پر ۲۷مه، ۸صبح ورځپاڼې ته ویلي چې ډېری دا استادان د ماسټرۍ سند درلودونکي دي.
د سرچینو په وینا، طالبان غواړي د دې استادانو په لرې کولو سره د مدرسو ملایانو ته د ګمارنې زمینه برابره کړي.
دا په داسې حال کې ده چې له دې مخکې طالبانو د خوست له شېخ زاید پوهنتون څخه ۱۷ استادان په بېلابېلو پلمو له دندو ګوښه کړي وو.
په خوست کې طالبانو د پوهنتون استادانو د ګوښه کېدو ترڅنګ د ترافیکو ریاست هغه کارکوونکي هم چې له تېر جمهوري نظام راهیسې پر دنده بوخت وو، ګوښه کړي دي.
