۸صبح، ننګرهار: د ننګرهار سیمهییزې سرچینې وايي چې طالبانو د دغه پوهنتون ۴۲ استادان د اسلامي حزب، جمعیت اصلاح، وهابي او حزبالتحریر په ګډون په مذهبي خوځښتونو کې د غړیتوب په تور له دندو ګوښه کړي دي.
سرچینو چهارشنبه د لیندۍ پر ۲۸مه، ۸صبح ورځپاڼې ته ویلي چې د طالبانو د لوړو زدهکړو وزارت ننګرهار پوهنتون ته د دې استادانو نوملړ استولی او د هغوی د ګوښه کېدو خبر یې ورکړی دی.
د سرچینو په وینا، دا استادان د شرعیاتو، کرنې، حقوقو او سیاسي علومو، ښوونې او روزنې او یو شمېر نورو پوهنځیو اړوند دي.
د ننګرهار پوهنتون طالب مسوولانو تر اوسه د دې استادانو د ګوښه کېدو په تړاو څه ویلي نه دي.
دا په داسې حال کې ده چې تېره اوونۍ د طالبانو د لوړو زدهکړو وزارت د کونړ پوهنتون ۱۲ استادان هم د سلفي مذهب په تور له دندو ګوښه کړي وو.
د طالبانو د لوړو زدهکړو سرپرست وزیر ندامحمد ندیم تېر کال د هېواد په پوهنتونونو کې د دې خوځښتونو پر فعالیت بندیز ولګاوه او خبرداری یې ورکړ چې د دې خوځښتونو غړي به مجازات شي.
