۸صبح، ننګرهار: سرچینې وايي چې طالبانو د ننګرهار پوهنتون د شرعیاتو پوهنځي یو استاد ګوښه کړی او پر ځای یې د پاکستانۍ حقانیه مدرسې یو ملا ګومارلی دی.
د هغه مکتوب پر بنسټ چې چهارشنبه د سلواغې پر ۳مه، ۸صبح ورځپاڼې ته رسېدلی، د طالبانو د لوړو زدهکړو وزارت د ننګرهار پوهنتون د شرعیاتو پوهنځي استاد فخرالدین قانت له دندې ګوښه کړی او پر ځای یې «ملا محمد یوسف» ټاکلی دی.
ورته مهال، سرچینې وايي چې «محمد یوسف» د پاکستان د حقانیه مدرسې یو ملا دی.
همداراز، طالبانو د کونړ د سېدجمالالدین افغان پوهنتون د شرعیاتو پوهنځي دوه استادان هم له دندو ګوښه کړي دي.
دا په داسې حال کې ده چې څه موده مخکې طالبانو د خوست له شېخ زاید پوهنتون څخه یو شمېر استادان په بېلابېلو پلمو له دندو ګوښه کړي وو.
د یادونې ده چې پر هېواد د طالبانو له واکمنېدو وروسته، د پوهنتون سلګونه استادان له هېواده وتلي یا د دغې ډلې له خوا له دندو ګوښه شوي دي.
