۸صبح، کابل: د طالبانو د کورنیو چارو وزیر سراجالدین حقاني د ختیځې مدیترانې لپاره د روغتیا نړیوال سازمان له مشرې حنان حسن بلخي او مل پلاوي سره ولیدل.
باختر خبري اژانس یکشنبه د چنګاښ پر ۱۴مه راپور ورکړی چې دواړو د افغانستان پر روغتیايي سکټور، روغتیايي همکاریو، همغږۍ او د پولیو واکسیناسیون پر پروګرامونو بحث کړی دی.
په دې لیدنه کې په افغانستان کې د روغتیايي خدماتو اړوند پر همکارۍ او د روغتیايي خدماتو پر پیاوړتیا ټينګار شوی دی.
د راپور له مخې، سراجالدین حقاني ویلي چې په افغانستان کې د تېر پرتله د روغتیايي خدماتو د وړاندې کولو لپاره شرایط ښه شوي او د روغتیايي وضعیت د ښه کېدو لپاره دې ترې ګټه واخیستل شي.
نوموړي ټینګار کړی چې روغتیايي خدمات د بشردوستانه مرستو مهمه برخه جوړوي او اړتیا ده چې له سیاسي ملاحظاتو پرته دې په دې برخه کې ګډه همکاري دوام وکړي.
د یادونې ده چې پر افغانستان د طالبانو له بیاواکمنېدو وروسته د افغانستان روغتیايي سکټور له ګڼو ننګونو سره مخ شوی دی.
