په سیاسي چارو کې د ولسمشر سلاکار محمد اکرم خپلواک ویلي چې یو شمېر دیني عالمانو او قومي مشرانو له ولسمشر غني سره په کتنه وړاندیز کړی چې غواړي د سولې په اړه طالبانو ته جرګه شي او دا وړاندیز یو شمېر دیني عالمانو او قومي مشرانو له ښاغلي غني سره په لیدنه کې کړی چې ولسمشر هم له دې وړاندیزه هرکلی کړی دی.
ښاغلي خپلواک د غويي په ۲۸مه نېټه ویلي چې دیني عالمانو او قومي مشرانو ولسمشرغني ته ویلي، دوی به له طالبانو سره د سولې د ارادې او نورو موضوعاتو په اړه وضاحت وغواړي.
د ولسمشر سلاکار وایي چې محمد اشرف غني د دوی ددغه وړاندیز هرکلی کړی دی. دا یو مثبت ګام دی چې دیني عالمان او قومي مشران له دواړو خواوو سره په دې اړه خبرې وکړي، دا چې دغه منځګړیتوب څه ډول بریالی او ټول بهیر افغاني او ولسي شي ترڅو تلپاتې سولې ته ورسېږو. ښاغلی خپلواک زیاتوي چې د ولسونو دا جرګه به مثبتې پایلې ولري.
د ولسمشر د سلاکار په وینا، د دیني عالمانو او قومي مشرانو له خوا دا جرګه به ولسي بڼه ولري او ډېر زر به یې جزیات روښانه شي.
طالبانو تراوسه په دې اړه څه نه دي ویلي، خو له دې مخکې یې جوته کړې چې دا ډله د سولې لپاره اراده لري.
ولسمشرۍ دفتر هم تاییدوي چې له دیني عالمانو او قومي مشرانو سره په کتنه کې ښاغلي غني د سولې په اړه د حکومت تګلاره بیان او په دې برخه کې یې د ولسي ملاتړ هرکلی کړی دی.
اخوا، د سولې په چارو کې د دولت وزارت وايي، د هر هغه ګام هرکلی کوي چې د سولې خبرو له پرمختګ سره مرسته وکړي او تاوتریخوالی پای ته ورسوي.
له دې مخکې حکومت له طالبانو ډلې غوښتي چې هر ډول او په هر ځای کې د سولې خبرو ته چمتو دی.
خو طالبان بیا وايي چې د سولې د خبرو ځای روښانه دی او حکومت د مذاکراتو په وړاندې د خنډونو په جوړولو تورنوي.
افغان حکومت وايي چې د بهرنیو ځواکونو له وتلو وروسته د جګړې د دوام لپاره هېڅ پلمه نه ده پاتې نو بایده دي چې طالبان له جګړې لاس واخلي او تلپاتې سولې ته غاړه کېږدي.