۸صبح، کندهار: په کندهار کې سرچینې وايي، په کندهار ښار کې طالب جنګیالیو پر یوه ملکي موټر ډزې کړې او په موټر کې يو سپور کس يې ویشتی دی.
سرچینو يکشنبه د تلې پر ۲۶مه، له ۸صبح ورځپاڼې سره په خبرو کې وويل چې دا پېښه نن له غرمې مخکې شاوخوا لس بجې د کندهار ښار د اوومې ناحیې اړوند د پنجوايي په څلورلارې کې شوې ده.
د سرچینو په وینا، طالب جنګیالي په ملکي جامو کې په یوه امنیتي پلټنځای کې ځای پر ځای شوي وو چې پر دغه موټر یې ډزې وکړې او یو تنکی ځوان یې وويشت.
سرچینې زیاتوي چې طالبانو له پېښې وروسته سیمه کلابنده کړې او خلک یې د پېښې ځای ته له تګه منع کړي دي.
د سرچینو په وینا، دغه تنکی ځوان تر ډزو وروسته د پېښې په ځای کې پر سړک لوېدلی دی.
تر اوسه د دغه تنکي ځوان د هویت او روغتیايي وضعیت په اړه نور معلومات نشته.
