۸صبح، خوست: په خوست کې سرچینې وايي چې په تېره یوه اوونۍ کې په دې ولایت کې د ځوانانو د ځانوژنې له ۱۰ ډېرې پېښې ثبت شوې دي او نن سهار یو بل ځوان هم ځان وژلی دی.
دغو سرچینو پنجشنبه د وږي پر ۱۲مه، ۸صبح ته ویلي چې په دې ولایت کې د ځوانانو په منځ کې د ځانوژنې بهير مخ پر زياتيدو دي.
د معلوماتو له مخې، دغه ځوان د خوست ولایت د تڼيو ولسوالۍ په درهګي سیمه کې ځان وژلی او د هغه د ځانوژنې کره لامل لا څرګند نه دی.
د سرچینو په وینا، د ډېرو دغو پېښو لاملونه ناڅرګند راتلونکی، اقتصادي ستونزې، بېکاري او خپګان بلل کېږي.
دا په داسې حال کې ده چې پرون هم په دې ولایت کې یوه تنکي ځوان د ګولیو په خوړلو سره خپل ژوند پای ته رسولی و.
د یادونې وړ ده چې طالبانو د دغو پېښو پر رسنیز کېدو محدودیتونه لګولي او کورنۍ اړ باسي چې نامعلومې ناروغۍ د مړینې لامل یادې کړي.
