۸صبح، بادغیس: په بادغیس کې ځايي سرچینې وايي چې «بيبي صدیقه» له عمر خوړلي کس سره جبري واده ته د نه ویلو له کبله بندي شوې ده.
سرچینو شنبه د چنګاښ پر ۶مه ۸صبح ورځپاڼې ته وویل چې «بيبي صدیقه» د رجب لور د بادغیس د بالامرغاب ولسوالۍ د «موریچاق» کلي اوسېدونکې ده چې له پنځو کالو راهیسې د جبري واده له ستونزه سره مخ شوې ده.
سرچینو ویلي چې دا نجلۍ چې کله ۱۲ کلنه وه، د خپل پلار د پور له کبله د «خدای نظر» په نوم یو کس په زور له کوره وړې ده.
سرچینو خدای نظر سیمهییز مشر او د طالبانو ملاتړی بللی او ویلې یې دي چې اوس په سیمه کې د نوموړي خبره قانون دی.
د سرچینو په خبره، صدیقه د خدای نظر په کور کې له شپږ میاشتني اسارت وروسته د سپین ږیرو په منځګړیتوب د هغه له کوره وتلې او د طالبانو تر څار لاندې راغلې ده.
د سرچینو د معلوماتو له مخې، د صدیقې دوسیه چې په بادغیس کې د طالبانو ابتداییه او استیناف محکمو ته راجع شوې، قاضیانو ورته ویلي چې یا دې له خدای نظر سره واده وکړي یا زندان ته لاړه شي چې صدیقې دا غوښتنه رد کړې او له همدې امله یې د زندان حکم ورته صادر کړی دی.
د سرچینو په خبره، د صدیقې دوسیه د هغې کورنۍ په کندهار کې د طالبانو د مشر دفتر ته وړې، خو په کندهار کې د تمیز محکمې د ۱۴۰۳ کال د لړم پر ۱۵مه، په شفاهي ډول د هغې د نیولو حکم صادر کړی دی.
د سرچینو په وینا، تازه یې صدیقه چې اوس ۱۷ کلنه ده، له کندهاره د بادغیس قلعهنو زندان ته لېږدولې ده.
سرچینې وايي چې په دې موده کې یوازيني کس چې له صدیقې او د هغې له کورنۍ یې د مدافع وکیل په توګه، دفاع او ملاتړ کړی، د «ارباب حامد» په نوم یو کس دی او هغه هم دوه کاله مخکې د هرات ښار په «خواجه کله» سیمه کې په مرموز ډول ترور شوی دی.
د سرچینو د څرګندونو له مخې، څرګنده نه ده چې د ارباب حامد ترور د صدیقې د وکالت له کبله و که د نورو لاملونو له کبله.
شته معلومات ښيي چې «خدای نظر د غلام رسول» زوی شاوخوا ۷۰ کلن دی او د صدیقې د کورنۍ د معلوماتو له مخې درې ښځې لري.
ویل کېږي چې دغه کس شاوخوا یو کال مخکې په هرات کې د طالبانو په قول اردو کې دنده لرله، خو په وروستیو شپږو میاشتو کې یې د دندې یا د کار د ځای په تړاو هېڅ تایید شوي معلومات نه دي ترلاسه شوي.
د صدیقې د کورنۍ د ادعا له مخې، په بادغیس کې د طالبانو ابتداییه او مرافعه محکمو له څو کالو وروسته د صدیقې په ګټه پرېکړه وکړه، خو په کندهار کې د طالبانو د تمیز محکمې له شاوخوا دوو کالو وروسته په شفاهي ډول د هغې خلاف حکم صادر کړی او له هماغه مهاله تر اوسه په زندان کې ده.
