۸صبح، کابل: سرچینې وايي چې د طالبانو د کورنیو چارو وزیر سراجالدین حقاني په منځګړیتوب په پکتیکا او خوست کې د ګیانخېلو او بوريخېلو قومونو ترمنځ روغه جوړه ماته شوې ده.
دغو سرچینو دوشنبه د وږي پر ۲مه ۸صبح ورځپاڼې ته وویل چې دا دوه قومونه د غره د ملکیت پر سر شخړه لري او د دواړو غاړو ځوانان بیا یو بل ته ګواښونه کوي.
د معلوماتو له مخې، دا روغه د ګیانخېلو له خوا ماته شوې او ادعا کوي چې دا یو اړخیزه ده او د دغه قوم حق دې ورکړل شي.
د سرچینو په خبره، هغوی خبرداری ورکړی چې که حق یې ورنه کړل شي، پر داسې کار به لاس پورې کړي چې طالبان یې تمه هم ونه لري.
هغوی ویلي چې د ګیانخېلو قوم ټول مشران د روغې له ماتېدو وروسته طالبانو نیولي او زنداني کړې یې دي.
ګیانخېلو ویلي چې د سراجالدین حقاني جوړجاړي ته درناوی لري، خو دا روغه یو اړخیزه ده او ګیانخېلو ته حق نه دی ورکړل شوی.
د معلوماتو له مخې، ګیانخېل قوم پر روغې د بیاکتنې غوښتنه کړې.
سرچینو خبر ورکړی چې د دغو دوو قومونو ترمنځ د سراجالدین حقاني او لویې پکتیا مشرانو په منځګړیتوب روغه شوې وه، خو اوس ماته شوې او یو ځل بیا دواړو قومونو مورچې نیولې دي.
دا په داسې حال کې ده چې د دغو دوو قومونو ترمنځ د یوه غره د مالکیت پر سر شخړه له لسیزو دوام لري او تر اوسه پکې د دواړو غاړو لسګونو کسانو ته مرګ ژوبله اوښتې ده.
