۸صبح، نیمروز: سرچینې وايي چې د طالبانو استخباراتو یو پخوانی نظامي له ایرانه تر را اېستل کېدو وروسته په نیمروز ولایت کې نیولی او وهلی ډبولی دی.
سرچینو چهارشنبه د لړم پر ۲۷مه، ورځپاڼې ۸صبح ته ویلي چې دغه پخوانی نظامي د بدخشان ولایت اصلي اوسېدونکی دی.
د سرچینو په وینا، نوموړی له ایرانه تر جبري راستنېدو وروسته د طالبانو د استخباراتو له خوا نیول شوی دی.
سرچینې زیاتوي چې طالبانو دغه پخوانی نظامي د کوم څرګند دلیل له وړاندې کولو پرته نیولی او وهلی ډبولی دی.
د طالبانو له بیا واکمنېدو وروسته، سره له دې چې د دغې ډلې مشر د عمومي بښنې فرمان صادر کړی، لا هم د پخوانیو نظامیانو د نیولو، شکنجه کولو او وژلو په اړه راپورونه خپرېږي.
د دغه فرمان له صادرېدو نږدې پنځه کاله تېر شوي، خو راپورونه ښيي چې له پخوانیو نظامیانو سره دا ډول چلند لا هم دوام لري






