۸صبح، غزني: ځايي سرچینې وايي چې د غزني ولایت په ګیرو ولسوالۍ کې یو ۱۲ کلن ماشوم وژل شوی دی.
ځايي سرچینو چهارشنبه د لړم پر ۲۷مه، ۸صبح ورځپاڼې ته وويل چې د دغه ماشوم جسد د ګیرو ولسوالۍ د عليخېلو کلي په یوه غرنۍ سېمه کې موندل شوی دی.
د سرچینو په وینا، دغه ماشوم څلور ورځې مخکې خپل کور ته له نږدې سیمې ورک شوی و.
په غزني کې د طالبانو امنیه قوماندانۍ هم د دې پېښې پخلی کړی دی.
طالبانو ویلي چې ښايي دغه ماشوم د شخصي دښمنیو له امله وژل شوی وي.
دا پېښه په داسې حال کې شوې چې په وروستیو میاشتو کې د هېواد په بېلابېلو سیمو کې د جنايي پېښو، هدفي وژنو او غلاوو د زیاتېدو راپورونه خپرېږي.
د ماشومانو د امنیت پر وړاندې د ګواښونو زیاتېدو د هېوادوالو اندېښنې راپارولې دي.






