۸صبح، کندهار: په کندهار کې ځايي سرچینې وايي چې پر کندهار د پاکستان له بیګانیو هوايي بریدونه وروسته اووه مړي او اته ټپیان میرویس روغتون ته وړل شوي دي.
سرچینو پنجشنبه د تلې پر ۲مه ۸صبح ورځپاڼې ته وویل چې د ځينو ټپيانو روغتیايي وضعیت ښه نه دی او دا ټول د ودانیزو چارو کاریګر و.
د سرچینو په خبره، دا کسان د شپې په تیاره او په امبولانسونو کې لېږدول شوي او د امبولانسونو چلوونکو ته ویل شوي چې اژیرونه ونه کاروي.
تر اوسه د دغو هوايي بریدونو له کبله د رامنځته شویو ټولو تلفاتو په اړه کره معلومات نه شته.
سرچینې وايي چې بیګا د شپې شاوخوا ۳:۳۰ نیمې بجې پاکستاني جېټ الوتکو د «ملا صاحب سرای» اړوندې سیمې باندې هوايي بریدونه کړي.
د سرچینو په خبره، دا سیمه اوس د هبتالله اړوند د ځانګړو ځواکونو نظامي مرکز دی.
ویل کېږي چې د هوايي بریدونو د چاودنو غږونه تر څو کیلومترۍ اورېدل شوي او د کندهار ښار اوسېدونکي یې اندېښمن کړي و.
سرچینې وايي چې د بمبار سیمې ته نږدې، د ودانیو شیشې ماتې شوې دي.
