۸صبح، هلمند: په هلمند کې د روغتیا نړیوال سازمان (WHO) او د ملګرو ملتونو د ماشومانو د ملاتړ صندوق (یونیسف) د واکسین برخې مسوولان په دغه ولایت کې د واکسیناسیون په بهیر کې د طالبانو له لاسوهنې خبر ورکړی دی.
مسوولانو دوشنبه د لړم پر ۴مه ویلي چې د طالبانو لاسوهنې یې د فعالیتونو مخه نیولې او د واکسیناسیون په پروګرامونو کې یې ځنډ رامنځته کړی دی.
ورته مهال باخبرو سرچینو ۸صبح ورځپاڼې ته وویل چې په هلمند کې طالب چارواکي د واکسین برخې د کارکوونکو د ګومارنې او عامه پوهاوي په ناستو کې لاسوهنه کوي.
د سرچینو په خبره، دا کسان په هلمند کې د طالبانو د عامې روغتیا رییس او واکسیناسیون د بېړني مرکز ولایتي مسوول په ملاتړ، په دغه بهیر کې پر فساد لاس پورې کوي.
سرچینې زیاتوي چې په هلمند کې د واکسیناسیون د بېلابېلو برخو کارکوونکي د طالب چارواکو د شفاهي حکم له مخې ګومارل کېږي او د ګومارنې ازموینې یوازې نمایشي بڼه لري.
د سرچینو په خبره، په دغه ولایت کې د عامه پوهاوي په ناستو او د واکسیناسیون اړوند سیمینارونو کې طالبانو ته له نږدې کسانو پرته چاته د ګډون اجازه نه ورکول کېږي.
سرچینې زیاتوي چې یادو بنسټونو څو وارې دا ستونزې د هلمند ولایت له مقام سره شریکې کړې؛ خو د محلي چارواکو له ډاډ سربېره هم تر اوسه دغو شکایتونو ته پام نه دی شوی.
له بنسټونو سره د طالبانو ورته چلند یوازې تر هلمند پورې محدود نه دی؛ په ځينو نورو ولایتونو کې هم د ورته شکایتونو راپورونه خپاره شوي دي.
