۸صبح، کابل: سیمهییزې سرچینې وايي چې د افغانستان په سویلي حوزه کې د پولیو د کور پر کور واکسین پر تطبیق د طالبانو محدودیتونو، واکسین ته د ځینو ماشومانو لاسرسی له ستونزو سره مخ کړی دی.
سرچینو شنبه د وږي پر ۷مه ۸صبح ورځپاڼې ته وویل چې د طالبانو له واکمنېدو وروسته په کندهار، هلمند، روزګان او زابل کې د کور په کور واکسیناسیون بهیر درېدلی او اوس د پولیو واکسین جومات په جومات تطبیقېږي.
په سویل کې د واکسیناسیون یوه سرچینه ادعا کوي چې د دغه محدودیت په پایله کې په دې حوزه کې له ۳۰ تر ۳۵ سلنه ماشومان د پولیو واکسین له ترلاسي محرومېږي.
د دغو ولایتونو اوسېدونکي وايي چې دا پرېکړه د دې لامل شوې چې ځينو ماشومانو ته په سمه او بشپړه توګه واکسین ونه رسېږي.
سرچینې زیاتوي چې د واکسیناسیون پروګرام مسوولانو په وار وار هڅه کړې چې طالبان د کور په کور واکسیناسیون د پلي کولو لپاره قانع کړي.
د سرچینو په وینا، طالبانو د واکسیناسیون مسوولانو ته ویلي چې د دې ډلې مشر ملا هبتالله د «امنیتي دلایلو» له کبله په دې حوزه کې د کور په کور واکسیناسیون تطبیق ته اجازه نه ورکوي.
