۸صبح، کابل: په کندهار کې د درملو شرکتونو کارکوونکو د پاکستاني درملو د پلور د منع کېدو په غبرګون کې اعتراض کړی دی.
سرچینو چهارشنبه د لړم پر ۲۰مه ۸صبح ورځپاڼې ته وویل چې اعتراض د کندهار ښار د «نوي سړک» په سیمه کې پیل شوی و.
د سرچینو په خبره، طالب ځواکونو د دغه اعتراض مخنیوی او سیمه یې کلابنده کړې ده.
سرچینې وايي چې په دغه اعتراض کې د درملو شرکتونو مسوولان او کارکوونکو برخه لرله او د «پاکستاني درملو لپاره بدیل غواړو» شعار یې ورکاوه.
سرچینې وايي چې سیمه ته د امنیې قوماندانۍ، ۲۰۵ قول اردو او استخباراتو ځواکونه رسېدلي او د اعتراض له دوامه یې مخنیوی کړی دی.
نوی سړک سیمه چې د د درملو لوی شرکتونه پکې دي، دا مهال کلابند دی.
دا اعتراض د پاکستاني درملو د منع کېدو په غبرګون کې شوی دی.
سرچینې وايي چې طالبانو د درملو بازار ته د ملکیانو ورتګ هم بند کړی دی.
معترضان د اعتراض د دوام غوښتنه کوي.
