۸صبح، کابل: د هسپانیې د بهرنیو چارو وزارت وايي چې د طالبانو له واکمنۍ پنځه کاله وروسته لا هم افغان ښځې او نجونې له سیستماتیک تبعیض او پراخو محدودیتونو او د هېواد اوسېدونکي له سخت بشري ناورین سره مخ دي.
دغه وزارت یکشنبه د زمري پر ۲۵مه ټینګار کړی چې هسپانیا لا هم د ازادۍ، بشري حقونو او انساني کرامت په څېر ارزښتونو ته ژمنه ده او انساني کرامت ته له درناوي پرته له طالبانو سره د ډیپلوماتیکو اړیکو عادي کول ناشوني دي.
د هسپانیا د بهرنیو چارو وزارت زیاته کړې چې دا هېواد د افغانانو، په ځانګړې توګه د افغان ښځو او نجونو ترڅنګ ولاړه ده او د هغوی د بنسټيزو حقونو او ازادیو پر رعایت یې ټینګار کړی دی.
دا څرګندونې داسې مهال کېږي چې په افغانستان کې د ښځو او نجونو پر وړاندې د محدودیتونو د لا زیاتېدو، د بشري حقونو د وضعیت له خرابېدو او د بشري ناورین په اړه اندېښنې دوام لري.
