۸صبح، کابل: د پاکستان ځانګړي استازي محمد صادق او د افغانستان لپاره د چین ځانګړي استازي یوئه شیاویونګ د تحریک طالبان پاکستان او د ختیځ ترکستان د اسلامي غورځنګ د مخ پر زیاتېدونکو ترهګریزو ګواښونو په اړه خبرې کړې دي.
محمد صادق سهشنبه د وږي پر ۱۰مه پر خپله اېکس پاڼه کې لیکلي چې له خپل چینايي سیال سره یې رغنده خبرې کړې دي.
هغه ویلي چې پاکستان او چین د امنیتي او د ترهګرۍ ضد همکاریو پیاوړتیا او د ترهګرۍ د ټولو ډولونو پر وړاندې د همغږۍ زیاتولو ته په کلکه ژمن دي.
د محمد صادق په وینا، دتحریک طالبان پاکستان ډله (ټيټيپي) او د ختیځ ترکستان اسلامي غورځنګ د سیمې سوله او ثبات کمزوري کوي.
دا په داسې حال کې ده چې پاکستان تل طالبان د پاکستان د حکومت د مخالفو ډلو، په ځانګړې توګه د ټي ټي پي په ملاتړ، پناه ورکولو او تمویل تورنوي؛ هغه تورونه چې طالبانو تل رد کړي دي.
بلخوا، چین هم په خپلو لوېدیځو پولو کې د ختیځ ترکستان د اسلامي غورځنګ د تحرکاتو او فعالیتونو په تړاو په ځلونو اندېښنه څرګنده کړې ده.
