۸صبح، کندهار: د کندهار ولايت سپین بولدک ولسوالۍ کي سخته جګړه روانه ده.
د وېش بندر تېره شپه طالب وسله والو له سختي جګړې وروسته ونیوه او اوس مهال د وېش او بولدک ترمنځ جګړه روانه ده.
طالبانو د یوې اعلامیې په خپرولو سره ویلي چې د بولدک بندر یې نیولی او اوس مهال د دې ولسوالۍ امنیه قومندانۍ ته نږدې جګړه روانه ده او وسله وال طالبان غواړي چې هغه هم ونیسي.
دمګړی د سپین بولدک د وېش بازار او د ډيورنډ پر فرضی کرښه پروت بندر هم د وسله والو طالبانو په لاس کې دی.
د طالبانو ویاند رسنیو ته په رالېږلې خبرپاڼه کۍ د وېش سیمې ټولو سوداګرو او اوسېدونکو ته د امنیت ډاډ ورکړی او په خبره یې ډېر ژر به پر دغه لاره عادي تګ راتګ پیل شي.
په ورته وخت کې د کندهار امنیه قومندانۍ د وسله والو طالبانو له لوري د دې سیمو نیول کېدل تائیدوي، خو په خبره یې په سپین بولدک ولسوالۍ کې د افغان امنيتي ځواکونو عملیات روان دي، چې ډېر ژر به نیول شوې سیمې بېرته ونیسي.
