د سپینبولدک ولسوالۍ یو شمېر کسبه کاران او هټیوال وایي، له پاکستان سره د سوداګریزو لارو له تړل کېدو وروسته یې تر ۵۰ سلنه ډېره سوداګري او اقتصادي فعالیتونه له ځوړ سره مخ شوي دي. دوی وایي چې د طالبانو لهلورې د ښيلاس شټرینګ لرونکو موټرو پر وارداتو بندیز هم د دې لامل شوی چې سوداګریز فعالیتونه یې اغېزمن شي.
د سپینبولدک ولسوالۍ سوداګر حاجي خدایرحیم خان وایي: «له پاکستان سره د سوداګریزو لارو تړل کېدو مو کسب و کار ته سخت زیان اړولی دی. تر دې وړاندې به د کرښې دواړو غاړو ته زرګونو کسانو د همدې سوداګرۍ له لارې خپل ژوند تېراوه، خو اوس ګڼ خلک بېکاره شوي دي. له بدهمرغه، د عادي خلکو سوداګري او کسب و کار سیاسي او د دې پرېکړې له امله د خلکو اقتصادي ژوند له ستونزو سره مخ شوی دی.»
د سپینبولدک کسبه کاران وایي، مخکې به جاپاني، ټایواني او سنګاپوري موټر او د موټرو پرزې دغې ولسوالۍ ته راوړل کېدې، خو طالبانو یې واردات منع کړي دي.
د کانټینري سوداګرو د اتحادیې یو غړی بازمحمد وایي چې د طالبانو دا پرېکړه د دې لامل شوې چې د زرګونو بېوزلو کورنیو دسترخوانونه تش او ګڼې کورنۍ له ناوړه اقتصادي وضعیت او نامعلوم برخلیک سره مخ شي. د هغه په خبره ، دا پرېکړه د دې لامل شوې چې د سپینبولدک ولسوالۍ د موټرو بازار خالي شي، خلک خپلې دندې له لاسه او په سیمه کې سوداګري سقوط وکړي.
دا سوداګر وایي: «د ښيلاس شټرینګ لرونکو موټرو او د پرزو پر وارداتو یې بندیز د سپینبولدک پر سوداګریز بازار سخت اغېز کړی دی. د دې پرېکړې په پایله کې د موټرو بازارونه تش شوی، زرګونه کسان بېکاره شوي او ګڼو بېوزلو کورنیو د عایداتو سرچینه له لاسه ورکړې ده. که دغه بندیز دوام وکړي، په سیمه کې به د موټرو سوداګري له لا ډېرو ستونزو سره مخ شي.»
د دې اتحادیې یو بل غړی لعلخان اڅکزی وایي چې د موټرو او پرزو سوداګري د سیمه ییزو خلکو د کارموندنې او عایداتو یوه مهمه سرچینه وه او ګڼ سوداګر، د موټرو پرزه پلورونکي، مستریان، موټرچلوونکي، د بار وړلو کاریګر، ګودام لرونکي او ترانسپورټي شرکتونه په دې برخه کې فعالیت کوي. د هغه په خبره، له دې سوداګرۍ څخه نه یوازې دا چې د سپینبولدک اوسېدونکو ګټه اخیسته، بلکې د کندهار، کابل، هلمند، زابل او د افغانستان د نورو ولایتونو د موټرو بازارونه هم له وارداتي موټرو او پرزو ګټه ترلاسه کوله.
هغه زیاتوي: «د موټرو او پرزو سوداګري یوازې د څو سوداګرو شخصي کاروبار نه و، بلکې د سیمې د زرګونو اوسېدونکو لپاره د کار او عاید یوه مهمه سرچینه شمېرل کیده. د همدې سوداګرۍ له لارې مستریانو، موټرچلوونکو، د پرزو پلورونکو، د بار وړلو کاریګرو او ګودام لرونکو خپلې کورنۍ تمویلولې. دې سوداګرۍ نه یوازې د سپینبولدک خلکو ته ګټه رسوله، بلکې په کندهار، کابل، هلمند، زابل او نورو ولایتونو کې هم د موټرو بازارونه ورپورې تړلي و. د وارداتو له بندیز وروسته د دغو ټولو برخو کاروبار زیانمن شوی دی.»
د سپینبولدک ولسوالۍ د موټرو په بازار کې د مستریانو مشر محمدهمایون وایي چې د طالبانو له بندیز وړاندې به هره ورځ تر ۶۰ کانټینر ښيلاس شټرینګ لرونکي موټر او د موټرو پرزې دغه بازار ته وارد او هلته به تخلیه کېدې.
هغه وایي: «د طالبانو له بندیز مخکې به هره ورځ تر ۶۰ کانټینرو د ښيلاس شټرینګ لرونکي موټر او د موټرو پرزې سپینبولدک ته واردېدې. د دغو کانټینرونو توکي به دلته تخلیه کېدل او وروسته به د افغانستان بېلابېلو ولایتونو ته لېږل کېدل. خو د دغه بندیز له پلي کېدو وروسته د موټرو بازارونه تش شوي او زموږ د معلوماتو له مخې، په دې برخه کې له ۶۰ تر ۷۰ زرو پورې کسان بېکاره شوي دي.»
د سپینبولدک په سوداګریز بازار کې یو بل د کانټینرو سوداګر عبدالحلیم اکا وایي: «د موټرو او پرزو پر وارداتو د بندیز تر اعلان وروسته، ۱۰ لویو سوداګرو هڅه وکړه چې د طالبانو له بېلابېلو چارواکو سره د دې پرېکړې د لرې کولو په اړه خبرې وکړي. موږ خپلې ستونزې په کندهار کې د طالبانو له والي، د ریاستالوزرا دفتر او د دې ډلې له نورو اړوندو چارواکو سره شریکې کړې او ورته مو وویل چې د ترافیکي پېښو مخنیوی یوازې د وارداتو په بندولو امکان نه لري. خو له ټولو هڅو سره سره، مو غوښتنې ونه منل شوې او سوداګر له کومې پایلې پرته ستانه شول.»
۲۴ کلن ځوان حبیبالله چې مخکې یې د کانټینري توکو د تنظیم او لېږد په برخه کې کار کاوه، وایي چې هره ورځ یې له پنځو زرو تر ۱۵ زرو پاکستانۍ کلدارو عاید درلود، خو اوس له ۱۰۰ ورځو ډېره موده کېږي چې بېکاره دی او تر اوسه یې بل کار نه دی موندلی. هغه وایي چې د ۱۱ کسیزې کورنۍ سرپرستي ورلغاړې ده او نه پوهېږي چې د هغوی ورځنۍ اړتیاوې به څنګه پوره کړي.
سپینبولدک د افغانستان د کندهار ولایت له مهمو سرحدي او سوداګریزو ولسوالیو څخه ده چې د افغانستان او پاکستان ترمنځ د سوداګریزو اړیکو په پیاوړتیا، د وارداتو او صادراتو په پراختیا او د اقتصادي فعالیتونو په غوړېدا کې ځانګړې ونډه لري.
شاوخوا ۴۰۰ ورځې وړاندې، د طالبانو او پاکستاني ځواکونو ترمنځ د نښتو او سیاسي کړکېچونو له امله، د سپینبولدک او پاکستان ترمنځ سوداګریزه دروازه د نورو سوداګریزو لارو ترڅنګ په بشپړه توګه وتړل شوه.
ښي لاسي شټرینګ لرونکي موټر چې په یو کیلي هم پېژندل کېږي، طالبان وايي چې د دغو موټرو چلوونکي د سړک او د نورو موټرو د تګ راتګ پر مسیر کافي لید نه لري او دا د دې لامل کېږي چې ترافیکي پېښې زیاتې شي.
طالبانو افغانستان ته د ښي لاس لرونکو موټرو پر وارداتو بندیز لګولی. دا پرېکړه د طالبانو د وزیرانو شورا د ۲۰مې ګڼې پرېکړې پر بنسټ شوې او د دې ډلې د مالیې وزارت ته دنده سپارل شوې چې افغانستان ته د هغو موټرو د واردېدو مخه ونیسي چې د هېواد د موټرچلونې له سیسټم سره سمون نه لري.






