۸صبح، کابل: د پاکستان د بهرنیو چارو وزارت ویاندې زهرا ممتاز بلوڅ ویلي چې طالبان په افغانستان کې ترهګرو ډلو ته پټنځایونه ورکړي دي.
بلوڅ دا څرګندونې پنجشنبه د لړم پر ۱۰مه، په یو خبري کنفرانس کې مطرح کړي دي.
د پاکستان د بهرنیو چارو د وزارت ویاندې زیاته کړې چې اسلاماباد په وار وار په افغانستان کې د ترهګرو ډلو د حضور په تړاو خپلې اندېښنې څرګندې کړي دي.
په پاکستان کې د طالبانو سفیر سرداراحمد شکیب څو ورځې مخکې ویلي و چې دغه ډله ترهګرو ته اجازه نه ورکوي څو د افغانستان خاوره د پاکستان پر ضد وکاروي.
له دې مخکې د پاکستان لومړي وزیر شهباز شریف په اسلاماباد کې د شانګهای همکارۍ سازمان په غونډه کې ویلي و چې ترهګرې ډلې په افغانستان کې حضور لري او پر وړاندې یې باید اقدام وشي.
پاکستاني امنیتي چارواکو تل ټینګار کړی چې ټيټيپي د افغانستان له خاورې د پاکستاني پوځیانو پر وړاندې بریدونه پلانوي.
طالبان بیا په افغانستان کې د ټيټيپي په ګډون د ترهګرو ډلو حضور نه مني.
