۸صبح، کابل: د افغانستان او پاکستان ترمنځ د سوداګریزو لارو تړل کېدو ، دواړو لوریو ته د توکو بیې لوړې او سوداګریزې چارې یې له ګڼو ننګونو سره مخ کړې دي.
رویټرز پنجشنبه د لړم پر لومړۍ راپور ورکړی چې لارې د دواړو لوریو ترمنځ له ځمکنۍ جګړې او هوايي بریدونو وروسته وتړل شوې چې له امله یې د سوداګرۍ او ترانزیت ګڼې برخې ودرېدې.
د افغانستان – پاکستان د سوداګرۍ خونې رییس خان جان الکوزي رویټرز ته ویلي: «د نښتو له پیل وروسته ترانزیت او سوداګري په ټپه ودرېده.»
نوموړي زیاته کړې چې دواړه لوري به د لارو د تړل کېدو له کبله شاوخوا یو میلیون ډالر زیان وکړي او د ورځې کابو ۵۰۰ کانټینره سبزي چې د صادراتو لپاره تیارېده، له منځه تللې ده.
د راپور له مخې، تازه مېوې، سبزيجات، معدني مواد، درمل، غنم، وريژې، بوره، غوښه او لبنيات د پاکستان او افغانستان تر منځ د دوو میلیاردو ډالرو کلنۍ راکړې ورکړې لویه برخه جوړوي.
د یادونې ده چې د دواړو لوریو ترمنځ د قطر او ترکیې په منځګړیتوب اوربند وشو، خو سوداګريزې لارې لا هم تړلې دي او ټاکل شوې چې د خبرو دویم پړاو په ترکیې کې وشي.
