«بېواکه صوروتونه» د چاپ پر ګاڼه سنبال شو!

د بېواکه صورتونه (فيمينستي ادبي نظريه) تر سرلیک لاندې کتاب چې ښاغلي اجمل ښکلي ليکلی دی، په وروستیو ورځو کې د سمون خپرندويې ټولنې لخوا چاپ او بازار ته راووت.
د پښتو ادب ځينو لارويانو او مينه والو په وينا، پښتو ادب اوس مهال داسې نويو کتابونو ته سخته اړتيا لري، ځکه په دې برخه هېڅ کار نه دی شوی او دا تشه بايد ورو ورو ډکه شي.
د همايون بهادري په نامه يو ځوان په خپل فيسبوک د کتاب انځور په خوا کې ليکلي دي: «ډاکتر استاد اجمل ښکلی په پښتو ادب کې نوي بابونه پرانيزي». نوموړي د خپلې ليکنې په دوام وېلي چې پر پخوانيو نظريو اوس ګرد پروت دی او د داسې ارزښتمنو کتابونو ليکل او چاپول يې جدي اړتيا بللې ده.