۸صبح، کابل: طالبانو خبریالانو ته اجازه نه ده ورکړې، چې د کابل په لوېدیځ کې د سه شنبې ورځې چاودنو ته خبري پوښښ ورکړي.
د چاودنې په ځای کې سرچینې وایي، چې طالبانو دا سیمې کلابندې کړې او خبریالانو ته د تصویر اخیستو اجازه نه ورکوي.
د شاهدانو په وینا، په ممتاز ښوونیز مرکز کې له پرله پسې چاودنو او د دشت برچي د تېلو ټانک سیمې په عبدالرحیم شهید ښوونځي کې په درېیو پرله پسې چاودنو کې، لږ تر لږه ۲۶ تنه وژل شوي دي.
یوازې نهه مړي او ټپیان چې د څو تنو هویت څرګند نه دی، له ممتاز ښوونیز مرکزه محمد علي جناح روغتون ته لېږدول شوي دي.
شاهدان د عبدالرحیم شهید ښوونځي په مخکې د زده کوونکو د مړو خبره کوي.
د طالبانو د امنیه قوماندانۍ ویاند جاوېد ځدراڼ دا چاودنې تایید کړې، خو د دغو چاودنو له امله يې د تلفاتو په هکله څه نه دي ویلي.
تر اوسه کومې ډلې د دغو چاودنو مسوولیت نه دی منلی.
