۸صبح، کابل: رویټرز خبري آژانس د یوه تاجکستاني چارواکي له قوله راپور ورکړی، چې د برېښنا کاسا زر پروژې کار په افغانستان کې د امنیتي ستونزو له امله درېدلی دی.
د تاجکستان د برېښنا پروژې د دفتر رییس فیض علي سمیعوف جمعه د زمري پر ۲۸ رویټرز ته ویلي، د دې پروژې کار، چې ټاکل شوې وه په راتلونکي کال کې بشپړ شي په افغانستان کې درېدلی دی.
د دغه تاجکستاني چارواکي له قوله د کاسا زر پروژې تمویل، چې پاکستان ته د زر مېګاواټه برېښنا او افغانستان ته د ۳۰۰ مېګاواټه برېښنا لپاره طرحه شوې ځنډول شوې ده.
هغه هيله مندي څرګنده کړې، چې «له افغانستان سره د اړیکې ټینګې او د دې پروژې تطبیق وڅېړل شي.»
د رویټرز په راپور کې ویل شوي، چې که څه هم نړیوال بانک د دې پروژې یو اصلي ملاتړی دی؛ خو دغه بانک پرېکړه کړې، چې د طالبانو له منزوي کولو سره تر ډېره د ملګروملتونو سازمان د مرستندویه بنسټونو له لارې د بشردوستانه مرستو پر رسولو تمرکز وکړي.
امریکا هم په ۲۰۱۶ کال کې د کاسا زر پروژې په مالي تامین کې ګډون لري.
همداراز د اسلامي پراختیا بانک، د بریتانیا د نړیوالې پراختیا وزارت او د بیارغونې او پراختیا اروپایي بانک د دې پروژې نور تمویلوونکي دي.
کاسا زر پروژه له مرکزي اسیا څخه سویلي اسیا ته د برېښنا د لېږد ترټولو لویه پروژه ده، چې د کابو یو میلیارد او ۱۷ میلیون ډالر لګښت اټکل یې شوی دی.
