۸صبح، کابل: طالبانو ویلي چې په تېرو ۴۸ ساعتونو کې د هېواد په ۱۷ ولایتونو کې ۲۸ کسان د شدیدو بارانونو او ناڅاپي سېلابونو له کبله مړه شوي دي.
د طالبانو تر کنټرول لاندې باختر خبري اژانس شنبه د غبرګولي پر ۲مه راپور ورکړی چې دا شمېرې پېښو ته د چمتووالې ادارې خپرې کړې دي.
پېښو ته د چمتووالې ادارې د اطلاعاتو او خپرونو رییس او ویاند حافظ محمدیوسف حماد ویلي چې په دغو طبیعي پېښو کې ۱۰ کسان ټپيان شوي هم دي.
نوموړي زیاته کړې چې په دغو پېښو کې ۱۷۶ کورونه بشپړ او ۵۳۴ کورونه زیانمن شوي دي.
هغه زیاته کړې چې په دغو ولایتونو کې بارانونو، ناڅاپي سېلابونو، توپانونو، تالندې برېښنا او ږلۍ پراخ زیانونه اړولي دي.
دا په داسې حال کې ده چې د روان کال له پیله تر اوسه، د هېواد په بېلابېلو ولایتونو کې سختو بارانونو او سېلابونو پراخ زیانونه اړولي او د مرګژوبلې ترڅنګ یې ګڼ کورونه هم ړنګ کړي دي.
