۸صبح، کابل: د طالبانو کډوالو او بېرته راستنېدونکو چارو وزارت ویلي چې د تېرو درېیو کالو په اوږدو کې ۳.۷ میلیونه افغانان هېواد ته راستانه شوي دي.
نوموړي وزارت سهشنبه د زمري پر ۱۶مه په خواله شبکې اېکس کې د کډوالۍ نړیوال سازمان (IOM) هغه راپور رد کړی چې ویلي و په تېرو شاوخوا څلورو کالو کې اته میلیونه افغانان له هېواده وتلي دي.
وزارت زیاته کړې: «له بده مرغه ځینې ادارې د افغانستان په تړاو د تمویلوونکو پام خپلولو لپاره ناسم معلومات خپروي چې بده اغېزه یې مستقیماً په افغان ولس باندې کېږي.»
د نوموړي وزارت په وینا، له ۴۰ کالو وروسته لومړی وار دی چې هېواد ته د کډوالو د بېرته راستنېدنې بهیر چټک شوی دی.
له دې وړاندې د کډوالۍ نړیوال سازمان ویلي و چې له ۲۰۲۰ کال راهیسې نږدې اتو میلیونو افغانانو هېواد پرېښی دی.
نوموړي سازمان ویلي و چې له دې ډلې یو میلیون یې اروپايي هېوادونو او ۸۵ سلنه نور یې ګاونډیو هېوادونو ته تللي دي.
