۸صبح، کابل: د طالبانو د علومو اکاډمۍ مسوولان وايي چې په تېر یو کال کې د دغې ادارې له خوا ۳۴ کتابونه چاپ او ۲۵ کتابونه نور ژباړل شوي دي.
د علوم اکاډمۍ مسوولانو دوشنبه د وږي پر ۲۶مه د طالبانو د حساب ورکونې په پروګرام کې ویلي چې په دې موده کې د دغې ادارې ۳۷ علمي څېړنیزې پروژې بشپړې شوي او ۲۰۸ نورې پروژې تر کار لاندې دي.
د طالبانو په وينا، دغې ادارې په تېر یو کال کې ۵۷ کنفرانسونه او شپږ علمي – څېړنيز سيمينارونه جوړ کړي دي.
طالبان ادعا کوي چې دغې ډلې د هېواد د څېړونکو او لیکوالو لپاره لازمې اسانتیاوې برابرې کړي دي.
د طالبانو د ادعا پر بنسټ، د علومو اکاډمۍ په کتابتون کې ۱۸ زره ۵۰۰ کتابونه ځای پر ځای شوي دي.
د اسلامي بانکدارۍ لپاره د لارښود اسنادو چمتو کول، له بېلابېلو ادارو سره د همکاریو د تړونونو لاسلیک او روسیې، ایران، متحده عربي اماراتو، جاپان او چین ته دغې ادارې هئیت پلاوي سفرونه د طالبانو د علومو اکاډمۍ نورې لاسته راوړنې بلل شوې دي.
دا څرګندونې په داسې حال کې کېږي چې پر افغانستان واک ته د طالبانو له رسېدو وروسته ګڼ شمېر څېړونکي او لیکوالان د امنیتي او اقتصادي ننګونو له کبله له هېواده وتلي دي.
د دې ترڅنګ، طالبانو له تېرو درېیو کلونو راهیسې پر لیکوالو او خپرونکو ځپونکي بندیزونه لګولي دي.
